Skoraði sitt fyrsta mark í Bestu en er sjálfur ósammála því - „Þarf að rífa mig í gang"

„Leikurinn gegn ÍBV leggst bara mjög vel í mig. Við þurfum einfaldlega að mæta klárir til leiks og gera það sem við höfum verið að æfa. Ef við gerum það og höldum okkur við okkar leikplan þá trúi ég að þetta detti með okkur," segir Fúsi.

Birgir Ómar Hlynsson var á láni hjá ÍBV í fyrra, er hann með eitthvað í erminni sem gæti hjálpað á morgun?

„Biggi býr yfir nokkrum leyndarmálum sem munu hjálpa okkur vel á morgun."

Skoraði síðast í Eyjum
Hvaða minningar áttu af leikjum gegn ÍBV?

„Ég var ekki með í fyrri leiknum gegn þeim í sumar, þannig að ætli sterkasta minningin sé ekki frá 2024. Þá kom ég óvænt snemma inn á og náði að skora."

Fljúga til Eyja
Hvernig hefur undirbúningurinn verið?

„Undirbúningurinn er í raun bara sá sami og fyrir aðra leiki. Við höldum okkur við okkar rútínu og undirbúum okkur eins vel og hægt er. Munurinn er kannski helst ferðalagið því við fljúgum við til Eyja."

Ætlar sér fleiri mínútur og mörk á lokasprettinum
Sigfús hefur byrjað átta leiki í Bestu deildinni á tímabilinu. Hvernig sér tímabilið við þér? Eru vonbrigði að hafa ekki spilað og skorað meira?

„Þetta var frekar leiðinleg byrjun á tímabilinu hjá mér persónulega. Ég kom úr meiðslum og fór nánast beint úr þeim í veikindi, þannig að það hefur tekið sinn tíma að komast almennilega í gang. Núna þarf ég bara að rífa mig í gang, fá fleiri mínútur og vonandi koma að fleiri mörkum á lokasprettinum."

Leið ekki eins og markið hafi verið það fyrsta í sumar
Fyrsta markið kom í síðasta leik, var léttir að ná því?

„Mér leið ekki eins og þetta hafi verið fyrsta markið mitt því það er nú búið að taka af mér tvö önnur mörk sem voru lögleg eða skráð á vitlausan mann. En já að sjálfsögðu hjálpar þetta eitthvað með sjálfstraustið hjá mér. Nú er bara áfram gakk, leggja allt í þetta og hjálpa liðinu að halda sér í deildinni," segir Fúsi.

Hann gerði tilkall til marks Þórs gegn Fram á útivelli og svo fékk markið sem hann skoraði gegn Breiðabliki snemma móts ekki að standa þar sem hann var dæmdur brotlegur.