Kompany vann Championship-deildina með Burnley 2023 en liðið endaði svo í 19. sæti ensku úrvalsdeildarinnar á nýliðnu tímabili og féll úr deildinni.

„Það er mikill heiður að fá að vinna fyrir þetta félag. FC Bayern er stofnun í alþjóðlegum fótbolta," segir þessi fyrrum varnarmaður Manchester City sem lagði skóna á hilluna 2022. Hann stýrði Anderlecht áður en hann tók við Burnley.

Pep Guardiola, fyrrum stjóri Bayern, gaf Kompany sín bestu meðmæli og er talið að það hafi vegið þungt í þeirri ákvörðun þýska félagsins að ráða hann. Síðasta tímabil var mikil vonbrigði fyrir Bayern en liðið hafnaði í þriðja sæti Bundesligunnar.

Fjórir sögðu nei
Kompany var alls ekki fyrstur á blaði hjá Bayern en Xabi Alonso stjóri Bayer Leverkusen, Julian Nagelsmann landsliðsþjálfari Þýskalands og Ralf Rangnick landsliðsþjálfari Austurríki höfðu allir hafnað félaginu. Þá reyndi félagið árangurslaust að fá Tuchel til að halda áfram.

„Vincent Kompany passar vel inn í hugmyndafræði og einkenni FC Bayern. Hann er ungur og mjög metnaðarfullur þjálfari sem hefur mikla alþjóðlega reynslu. Hann er með puttann á púlsinum á leikmönnum og veit nákvæmlega hvers er krafist inni á vellinum," segir Christoph Freund, íþróttastjóri Bayern.