Albert fékk gult í slæmu tapi gegn nýliðunum

Antonio Raimondo kom gestunum yfir á 26, mínútu leiksins með snotru marki eftir skyndisókn. Fram að markinu höfðu heimamenn ef eitthvað er verið öflugri aðilinn í leiknum en markið virtist slá þá algjörlega út af laginu.

Gabriele Bracaglia tvöfaldaði forystu gestanna með marki á 38.mínútu leiksins er hann stýrði boltanum í netið úr teignum eftir fast leikatriði.

Það var svo Antonio Raimondo sem batt endahnútinn á sigur nýliðanna með sínu öðru marki á 68. mínútu leiksins.

Erfið byrjun á tímabilinu hjá Alberti og félögum sem steinlágu fyrir Roma í fyrstu umferð deildarinnar og eru því án stiga eftir tvær umferðir.