Davíð Smári: Þetta var hlægilegur dómur

Hvernig gerir þú þennan leik upp?

„Þetta var fíaskó hjá okkur. Við vorum heppnir að tapa ekki stærra.“

Leiknir fékk vítaspyrnu snemma leiks. Hvað fannst þér um hana?

„Þetta var hlægilegur dómur. Ég held að bæði lið séu sammála um að dómgæslan hafi verið á mjög lágu plani. Hún var slök á bæði lið. Ég ætla þó ekki að fela mig á bak við dómgæsluna. Við vorum slakir á öllum sviðum og heppnir að tapa ekki stærra.“

Hvað vantaði upp á hjá þínum mönnum?

„Orkustigið var lágt. Við náðum ekki að tengja sendingar, fylltum teiginn illa, vorum óskipulagðir og brotnir til baka. Grunngildin voru ekki góð og margt sem brást hjá okkur.“

Eiður Aron fór meiddur af velli. Veistu hver staðan er á honum?

„Nei, ekki enn þá.“

Býstu við að meiðslin séu alvarleg?

„Ég hélt það fyrst en hann mætti sjálfur inn í klefa og er ekki haltur. Ég býst því ekki við að þau séu alvarleg en það verður að koma í ljós.“

Þið voruð þegar öruggir með sæti í umspilinu. Hafði það áhrif á liðið?

„Ég hefði kannski frekar viljað að við værum ekki öruggir fyrir þennan leik. Þá hefðu menn mögulega mætt með annað hugarfar. Menn eiga samt að spila fyrir merki félagsins, hver annan og með stolti. Það vantaði fimm prósent hjá okkur en fimm prósent í fótbolta eru gríðarlega mikil.“

„Leiknismenn voru kraftmeiri og virtust vilja sigurinn meira. Það var mikið undir hjá þeim og með sigrinum eru þeir að bjarga sér úr fallbaráttunni. Við vissum að þetta yrði svona leikur. Það er mín ábyrgð að undirbúa liðið en við virtumst ekki tilbúnir.“

Fannst þér menn slaka á vegna þess að sætið í umspilinu var tryggt?

„Það væri afsökun. Staðreyndin er að Leiknir var betra liðið. Við ætlum ekki að leyfa afsakanir heldur fara vel yfir leikinn og bæta okkur.“

„Það skiptir ekki máli hvort dómgæslan var léleg eða vítaspyrnan rétt. Við þurfum að vera betri. Í úrslitakeppninni getum við lent í slakri dómgæslu, fengið ranga vítaspyrnu dæmda á okkur eða mætt kraftmeira liði. Það má ekki slá okkur út úr leiknum. Við þurfum að vera tilbúnir að takast á við allt sem fótboltinn býður upp á.“