Leikmaður meistaraflokks karla hjá FH hefur greinst smitaður af kórónuveirunni en þetta staðfestir Valdimar Svavarsson formaður knattspyrnudeildar FH í samtali við 433.is.
Smitið greindist í gær en erfiðlega hefur gengið að rekja upprunan á smitinu hjá umræddum leikmanni að sögn 433.is.
FH-ingar hafa æft í tíu manna hópum síðustu daga en passað upp á allar reglur, þrátt fyrir það var allur leikmannahópur liðsins sendur í sóttkví fram yfir páska.
„Við vildum bregðast við þannig að þó að við séum að æfa í hólfum og allt það, þá settum við allan hópinn í sóttkví fram yfir páska, þannig að við séum öryggir. Við viljum ekki stuðla að frekari útbreiðslu, fyrst að það eru páskar og smá frí. Þá tökum við enga sénsa,“ sagði Valdimar.
Í síðustu viku greindist leikmaður Fylkis með veiruna en umræddur leikmaður spilaði gegn Stjörnunni í 8-liða úrslitum Lengjubikarsins um þarsíðustu helgi. Samkvæmt heimildum Fótbolta.net smitaðist enginn liðsfélagi hans í Fylki né einhver leikmaður Stjörnunnar.
Athugasemdir