Brynjar Ásgeir Guðmundsson, leikmaður FH og þjálfari ÍH, var augljóslega sáttur eftir stórsigur ÍH í úrslitaleik um sæti í 3. deild.
ÍH skoraði sjö mörk gegn Kormáki/Hvöt eftir að hafa gert 1-1 jafntefli í fyrri leiknum á útivelli. Í kvöld var leikið í Skessunni.
„Við vorum komnir í 2-0 eftir tíu mínútur, sem var kannski ekki alveg það sem ég var búinn að sjá fyrir mér. Þeir sóttu aðeins á okkur eftir það en sem betur fer skoruðum við þriðja markið til að róa menn aðeins," sagði Brynjar Ásgeir.
„Í seinni hálfleik vorum við bara frábærir og hefðum getað skorað fleiri en þetta var alveg nóg. Ég held ég geti ekki beðið um mikið meira, 8-2 í undanúrslitum og 8-2 í 8-liða úrslitum, svo ég held að þetta hafi verið vel verðskuldað.
„Fyrri leikurinn var bara slagsmál en í dag spiluðum við við toppaðstæður og gæðamunurinn kom í ljós fannst mér."
Brynjar er ánægður með hvernig tímabilið þróaðist og segir að ÍH ætli að byggja á þessum árangri.
„Við lögðum mikið í þetta í sumar. Við vorum komnir í smá krísu þarna um mitt sumar þar sem við vorum sigurlausir fimm leiki í röð og svona. Núna erum við ekki búnir að tapa ellefu leiki í röð svo við toppuðum á réttum tíma.
„Við erum komnir í þriðju deild loksins en við erum ekki komnir þangað til að vera lengi. Við ætlum lengra."
Athugasemdir
