Hvaða áhrif munu slagsmálin í Keflavík hafa?

„Það hefur soðið upp úr. Það eru oft átök á æfingum en að nefbrjóta mann á æfingu, maður heyrir það ekki oft. Það getur alveg haft áhrif innan vallar þegar það er eitthvað svona í gangi utan vallar," segir Valur Gunnarsson í útvarpsþættinum Fótbolti.net þegar rætt er um handalögmálin sem komu upp á æfingu Keflavíkur í vikunni.

Tveimur leikmönnum lenti saman á æfingunni og fóru högg á milli manna. Leikmaður nefbrotnaði eftir högg frá kantmanninum Alpha Conteh samkvæmt heimildum.

Conteh var nýlega keyptur til Keflavíkur hjá Stjörnunni eftir að hafa leikið virkilega vel á láni hjá Keflvíkingum og talað er um í þættinum að það sé skellur fyrir þá að þetta komi upp þegar þeir eru nýbúnir að opna veskið og kaupa hann fyrir einhverjar milljónir.