Líkleg byrjunarlið í stórleiknum - Tveir snúa aftur hjá KR og enginn Vatnhamar

KR, sem hefur fengið fimmtán stig úr sinni sjö leikja taplausu hrinu í deildinni, endurheimtir tvo lykilmenn úr leikbanni. Þeir Arnór Ingvi Traustason og Finnur Tómas Pálmason tóku út leikbann gegn KA í síðustu umferð og Fótbolti.net spáir því að þeir komi beint inn í liðið aftur þrátt fyrir að Sigurður Breki Kárason hafi spilað frábærlega í fjarveru Arnórs og Michael Akoto spilað vel í fjarveru Finns. Að öðru leyti spáum við óbreyttu KR liði frá sigrinum á KA.


Víkingur hefur fengið ellefu stig úr sinni fimm leikja taplausu hrinu en eina tap Víkings í deildinni kom gegn Þór þar á undan. Það verður allavega ein breyting á liði Víkings frá tapinu gegn Borac í vikunni þar sem Gunnar Vatnhamar er að ganga í raðir danska félagsins Vejle og verður ekki með. Við spáum því að Sveinn Gísli Þorkelsson komi inn í hjarta varnarinnar og spili með Oliver Ekroth. Daníel Hafsteinsson er að komast af stað eftir meiðsli og við spáum því að hann komi inn á miðjuna fyrir Viktor Örlyg Andrason. Þeir Ármann Ingi Finnbogason og Nikolaj Hansen gera sterkt tilkall á sæti í byrjunarliðinu en við spáum því að Aron Elís Þrándarson verði áfram fremstur og að þeir Stígur Diljan Þórðarson og Hrannar Snær Magnússon verði áfram á kantinum. Svo er spurning hvort Ögmundur Kristinsson komi inn í markið en hann var á bekknum gegn Borac í vikunni. Við spáum því samt að Aron Snær Friðriksson haldi sæti sínu í markinu.

Aron Baldvin Þórðarson, aðstoðarþjálfari Víkings, tekur út leikbann í leiknum eftir að hafa fengið rautt spjald gegn Val.