Ítalíumeistarar Juventus hafa staðfest að Paul Pogba hafi fengið grænt ljós á að fara í læknisskoðun hjá Manchester United.
Þessi 23 ára franski landsliðsmiðjumaður hefur verið orðaður við 100 milljóna punda metsölu til United þar sem hann lék þrjá aðalliðsleiki áður en hann gekk í raðir Juve 2012.
Jose Mourinho sagði fyrir helgi að hann vildi að gengið yrði frá kaupunum fyrir 14. ágúst þegar United mætir Bournemouth í ensku úrvalsdeildinni.
Pogba hefur verið í sumarfríi síðan Frakkland tapaði úrslitaleik EM.
Viðræður United og Juventus hafa tekið dágóðan tíma en niðurstaða í málinu virðist vera að nálgast höfnina. Erfiðlega gekk að semja um greiðslur til umboðsmanns Pogba, Mino Raiola, en samkvæmt Guardian eru samningar þess efnis í höfn.
Guardian segir að Pogba muni skrifa undir fimm ára samning við United.
Uppfært: Manchester United hefur staðfest að Pogba sé á leið í læknisskoðun.
Athugasemdir