Leikmenn Þórs munu að öllum líkindum taka á sig launalækkun eftir fall liðsins úr Pepsi-deildinni. Leikmenn funduðu í gær með Aðalsteini Pálssyni formanni knattspyrnudeildar þar sem málin væru rædd.
,,Við hittumst og ræddum hvort menn myndu ekki sýna samstöðu og taka skellinn með liðinu," sagði Sveinn Elías Jónsson fyrirliði Þórs
,,Ég held að það sé eðlileg þróun að menn fái ekki jafnmikið fyrir að spila í 1. deild og í efstu deild. Það er ekkert sem liggur fyrir í þessu en það er verið að skoða þetta og athuga hvort menn ætli ekki að standa saman í þessu."
,,Ég held að þetta sé ekkert bundið við Þór. Þau lið sem fara niður eru ekki að fá sömu tekjur og í efstu deild."
Samkvæmt öruggum heimildum Fótbolta.net eiga leikmenn Þórs ennþá inni ógreidd laun frá því í sumar. Samkvæmt heimildum að norðan munu leikmennirnir þó fá þau laun greidd á næstu mánuðum.
Athugasemdir