Origi var borinn af velli eftir glórulaust brot argentínska varnarmannsins Ramiro Funes Mori snemma í síðari hálfleik en þá var staðan 2-0 fyrir Liverpool.

„Ef þú hefðir sagt mér að við myndum vinna Everton 4-0 myndi ég halda að ég yrði glaður en ég verð að viðurkenna að meiðsli Origi spilla gleðinni."

„Staðan á honum er ekki góð og í fyrstu héldum við að hann væri ökklabrotinn en svo er ekki. Ökklinn á honum er illa farinn og við verðum að sjá til. Það eru bara fjórar vikur eftir af tímabilinu."

„Ef þú vilt ná árangri verður þú að vera heppinn með meiðsli. Að sjá hann liggjandi á jörðinni var ekki þægilegt og ég gat ekki notið síðari hálfleiksins vegna þessa," sagði Klopp.