Arsenal er eitt af þremur félögum sem er í baráttunni um Santiago Gimenez, framherja Feyenoord í Hollandi, en þetta kemur fram í mexíkóska blaðinu Record.
Gimenez er 24 ára gamall landsliðsmaður Mexíkó sem hefur staðið sig vel í Hollandi.
Hann hefur gert 47 mörk í 84 leikjum fyrir Feyenoord og átti meðal annars stóran þátt í því að liðið vann hollensku deildina á síðustu leiktíð.
Record segir að Arsenal, Atlético Madríd og Juventus séu í baráttu um að kaupa Gimenez í sumar, en hann hefur ákveðið að taka skref í stærri deild eftir tímabilið.
Arsenal hefur verið í leit að hreinræktuðum framherja og tikkar Gimenez í öll boxin.
Eina vandamálið er verðmiðinn sem Feyenoord hefur sett á Gimenez en það vill fá allt að 100 milljónir evra fyrir kappann, sem fælir eflaust mörg félög frá.
Athugasemdir
