Talinn langlíklegastur til að taka við Chelsea

Enzo Maresca hætti í dag sem stjóri Chelsea eftir eitt og hálft ár í starfi hjá félaginu. Gengi liðsins hefur verið ansi dapurt að undanförnu og það var súrt á milli ítalska stjórans og stjórnendateymis Chelsea.

Liam Rosenior er samkvæmt veðbönkum talinn langlíklegasti kosturinn til að taka við starfinu. Rosenior er 41 árs Englendingur sem stýrir Strasbourg sem er eins konar systurfélag Chelsea. Rosenior hefur gert eftirtektarverða hluti með franska liðið sem spilaði gegn Breiðabliki í Sambandsdeildinni fyrr í þessum mánuði.

Rosenior lék á sínum tíma með Fulham, Reading, Hull, Ipswich og Brighton og yngri landsliðum Englands. Hann var stjóri Hull áður en hann flutti sig yfir til Strasbourg.

Næsti leikur Chelsea er gegn Manchester City á sunnudag.