Maresca hættur hjá Chelsea (Staðfest)

Enzo Maresca er hættur sem stjóri Chelsea, þetta staðfestir félagið á heimasíðu sinni.

Breytingar hjá Chelsea hafa legið í loftinu að undanförnu, stuðningsmenn voru farnir að missa trú á stjóranum og hann og stjórnendateymi Chelsea gengu ekki í takt.

Mikið var fjallað um ummæli Maresca á fréttamannafundi eftir sigur gegn Everton um miðjan desember. Þar gagnrýndi hann hluta stjórnenda opinberlega fyrir að standa ekki með sér á erfiðum köflum tímabilsins.

Gengi liðsins hefur verið mjög dapurt síðustu vikur, einungis tveir sigrar í síðustu níu leikjum og stjórinn mætti ekki á fréttamannafund eftir leikinn gegn Bournemouth á þriðjudag sem endaði með 2-2 jafntefli. Það reyndist lokaleikur Ítalans í starfi hjá Chelsea.