Líklegt byrjunarlið Íslands - Hræringar í vörninni?

Við spáum því að Arnar Gunnlaugsson geri aðeins eina breytingu á byrjunarliði sínu frá sigrinum gegn Lúxemborg.

Stefán Teitur Þórðarson fór meiddur af velli um miðbik síðari hálfleiks og kom Hörður Björgvin Magnússon inn í hans stað. Daníel Leó Grétarsson færðist hægra megin í vörnina eftir innkomu Harðar.

„Vonandi er þetta smá högg, hann stífnaði vel upp. Ég á ekki von á að þetta séu alvarleg meiðsli hjá honum,“ sagði Arnar í viðtali við Fótbolta.net eftir sigurinn á Lúxemborg.

Hann sagði jafnframt að Daníel Leó og Hörður Björgvin hafa náð vel saman í þeim leikjum sem þeir hafa spilað saman þrátt fyrir að vera báðir örvfættir. Því spáum við því að Hörður komi inn í stað Stefáns.

Aron Einar Gunnarsson gerir jafnframt tilkall í miðvarðarstöðuna en fyrst að Hörður kom inn fyrir Stefán á þriðjudag er búist við að hann sé ofar í goggunarröðinni.

TENGT EFNI01.10.26 - 10:27

Aron ekki komið við sögu í glugganum - Mun hann ná leikjametinu?

Arnar sagði jafnframt í viðtalinu að nú reyndi á hópinn þar sem liðið er að fara spila þriðja leikinn á einni viku. Skyldi hann ráðast í frekari breytingar gæti Mikael Egill Ellertsson myndi víkja úr liðinu og inn í hans stað kæmi annað hvort Kristall Máni Ingason eða Jón Dagur Þorsteinsson.

Það vakti athygli að Jón Dagur, sem var í byrjunarliðinu gegn Eistlandi, hafi ekki komið við sögu gegn Lúxemborg.

Gylfi Þór Sigurðsson spilaði allan leikinn gegn Lúxemborg og var hann einn af bestu mönnum vallarins. Hann sagðist sjálfur búast við því að geta byrjað aftur á laugardaginn í viðtali eftir leik.

Skyldi Gylfi ekki vera klár á laugardaginn gæti Hákon færst aftur á miðjuna eða Andri Fannar Baldursson komið inn. Andri hefur ekki komið við sögu í glugganum hingað til en er að gera gott mót með Kasimpasa í Tyrklandi.