Rúnar fékk rautt fyrir að grýta brúsa í vegg

Rúnar sá rauða spjaldið á 81. mínútu. Þórður Þorsteinn Þórðarson, dómari leiksins, dæmdi þá brot á leikmann Fram og lyfti gula spjaldinu. Rúnar áttaði sig um leið á því að leikmaðurinn yrði í banni í næsta leik.

„Ég snöggreiddist. Hann (Þórður Þorsteinn Þórðarson) dæmdi brot á minn mann og gaf honum gult spjald. Ég vissi að hann væri að fara í bann og við vorum þá þegar búnir að missa tvo í bann í næsta leik,“ sagði Rúnar við Vísi.

Í kjölfarið grýtti Rúnar brúsa í vegg og fékk reisupassann. Hann verður því sjálfur í banni ásamt þremur leikmönnum Fram, þeim Ægi Jarl Jónassyni, Sigurjóni Rúnarssyni og Israel Garcia.

„Mér fannst það bara rangt af honum og var að pirra mig. Ég grýtti brúsanum í vegginn. Ég má það víst ekki og verð bara að taka þetta á mig. Þetta var örstutt bræðiskast sem ég tók en ég var búinn að vera slakur allan leikinn og ræða við menn í rólegheitum. Þetta er það sem gerist. Maður hefur skap og vill vernda sína menn og líka passa upp á að koma skilaboðum til dómara. Skilaboðin voru ekki að kasta brúsanum í vegginn. Ég var búinn að ræða við fjórða dómara og ég var eitthvað voðalega reiður,“ sagði Rúnar enn fremur.

Hann gat þó fagnað dýrmætum sigri sem kom Fram upp í annað sæti með 37 stig. Framarar eru tveimur stigum á undan gömlu félögum Rúnars í KR, sem eiga þó leik til góða.