Infantino kallar saman til krísufundar - Sakaður um fjárkúgun

Gagnrýnisröddunum hefur fjölgað hratt en Mattias Grafström, framkvæmdastjóri FIFA, hefur bæst í hóp þeirra sem hafa gagnrýnt hugmyndirnar. Hann hefur verið hægri hönd Infantino undanfarin ár.

Grafström sendi tölvupóst til starfsfólks FIFA þar sem hann lýsti síðustu viku sem „harmleik og atburðarás sem verðskuldi ámæli“. Hann tók í sama streng og Kevin Lamour, framkvæmdastjóri rekstrarsviðs FIFA, hafði áður gert.

Arsene Wenger, yfirmaður fótboltaþróunar hjá FIFA, hefur tjáð sig og segir í yfirlýsingu að það hafi verið algjörlega nauðsynlegt að hætta við áætlunina. Hann segist ekki hafa vitað af þessum hugmyndum og ekki komið nálægt þeim.

Munu ekki styðja Infantino
Prins Ali bin al-Hussain, formaður fótboltasambands Jórdaníu, skrifaði yfirlýsingu í dag þar sem hann sakar FIFA um fjárkúgun í tengslum við mögulegt endurkjör Infantino.

Prins Ali segir Jórdaníu eiga eftir að fá verðlaunafé sem liðið vann sér inn með því að hafna í öðru sæti í Arabíubikarsins og FIFA hafi reynt að nýta sér það til að afla Infantino stuðnings.

„Það er ljóst að vandinn liggur hjá forystunni. Í marga mánuði hefur FIFA neitað að aðstoða okkur – þar til mér var tjáð munnlega að ef ég lýsti yfir stuðningi við Infantino myndi það hjálpa við að leysa vandamálin. Við í Jórdaníu leggjum metnað okkar í að virða siðferðileg gildi. Við lýstum ekki yfir stuðningi við hann áður og munum vissulega ekki gera það núna. Allt þetta mál jafngildir fjárkúgun og við neitum að láta undan slíku," segir prins Ali.