Klopp: Sögðumst ætla að skrifa söguna

Að leikslokum hrósaði hann andstæðingunum fyrir vel spilaðan leik og gaf sín fyrstu viðbrögð við tapinu.

„Aston Villa voru virkilega góðir í dag. (Ollie) Watkins var stórkostlegur og auðvitað er alltaf erfitt að eiga við Jack (Grealish) sem getur skapað færi úr öllum áttum. Fyrir nokkrum árum sögðumst við ætla að skrifa söguna. Við gerðum það í dag þó það hafi verið óheppilegt," sagði Klopp.

„Við bjuggumst ekki við þessu en það gerðist. Það vill enginn tapa 7-2. Vonandi tókum við út allan kvótann af mistökum og kjaftæði á tímabilinu í einum leik og getum haldið áfram á sömu braut og áður."

Liverpool er með níu stig eftir fjórar umferðir af nýju úrvalsdeildartímabili. Næsti leikur er gegn nágrönnunum í Everton sem tróna á toppi deildarinnar með fullt hús stiga. Liðin mætast um miðjan október, eftir landsleikjahlé.

„Við vorum ekki slakir í kvöld, við vorum lélegir. Ég verð að viðurkenna það en ég get ekki breytt því. Ég væri til í að spjalla við strákana um tapið en þeir eru að fara út í landsleikjahlé. Vonandi koma þeir heilbrigðir til baka og geta þá notað tvo daga til að undirbúa sig fyrir slaginn gegn Everton.

„Við vorum mjög skapandi í sóknarleiknum. Við skoruðum ekki úr færunum en vorum mjög skapandi. Vandinn var þegar Aston Villa fór í skyndisókn, þá vorum við alltof lélegir að loka á þá. Í kvöld gerðum við allt sem á ekki að gera í fótboltaleik."