Besta deildin: Mögnuð endurkoma hjá Víkingum - Varamennirnir gerðu gæfumuninn

Víkingur vann FH í mögnuðum leik í Kaplakrika í kvöld þar sem varamennirnir skiptu sköpum.

Það var mögnuð byrjun á þessum leik því Víkingur komst yfir strax í upphafi leiks þegar Helgi Guðjónsson lagði boltann í netið eftir sendingu frá Ara Sigurpálssyni.

Þetta sló FH-inga ekki út af laginu því Kjartan Kári Halldórsson jafnaði metin eftir glæsilegt einstaklingsframtak. Stuttu síðar skoraði Björn Daníel Sverrisson laglegt mark og FH komið með forystuna.

Víkingar settu pressu á FH undir lok fyrri hálfleiks og það hélt áfram í seinni hálfleiknum. Eftir rúmlega klukkutíma leik komu Sveinn Gísli Þorkelsson og Valdimar Þór Ingimundarson inn á hjá Víkingum og þeir áttu eftir að láta til sín taka.

Valdimar Þór jafnaði metin fyrir Víkinga með sinni fyrstu snertingu eftir sendingu frá Sveini.

Þeir voru svo aftur á ferðinni undir lok leiksins, sama uppskrift, Sveinn Gísli með sendingu inn á teiginn og Valdimar mætti og setti boltann í netið og tryggði Víkingum stigin þrjú.

FH-ingar fengu hornspyrnu á lokasekúndum leiksins en eftir mikil klafs mokaði Logi Hrafn Róbertson boltanum yfir markið.