Besta deildin: Keflavík gekk frá KA á níu mínútum

Keflvíkingar unnu glæsilegan 3-0 sigur á KA í 17. umferð Bestu deildar karla á HS Orkuvellinum í kvöld. Öll mörkin komu á mögnuðum níu mínútna kafla í fyrri hálfleik.

Mikið hefur gengið á í herbúðum Keflavíkur síðustu daga. Greint var frá slagsmálum á æfingu liðsins þar sem Alpha Conteh sló Muhamed Alghoul með þeim afleiðingum að sá síðarnefndi nefbrotnaði. Conteh var í byrjunarliðinu í kvöld en Muhamed og bróðir hans Halid voru ekki í leikmannahópnum.

KA-menn byrjuðu leikinn mun betur og sköpuðu sér nokkur færi áður en Keflvíkingar unnu sig hægt og rólega inn í leikinn.

Heimamenn brutu ísinn á 27. mínútu. Conteh lét vaða vinstra megin úr teignum, boltinn fór af varnarmanni KA og barst til Sindra Snæs Magnússonar. Fyrirliði Keflavíkur gerði sér mat úr færinu og kláraði snyrtilega.

KA-liðið hrundi í kjölfarið og fékk á sig tvö mörk til viðbótar á næstu níu mínútum.

Langur bolti kom úr vörn Keflavíkur á 32. mínútu og Axel Ingi Jóhannesson kom honum fyrir markið á Dag Inga Valsson sem tvöfaldaði forystuna.

Stefan Alexander Ljubicic bætti þriðja markinu við fjórum mínútum síðar. Varnarmenn KA skölluðu háan bolta beint fyrir fætur Stefans sem renndi honum í netið og skoraði sitt sjöunda deildarmark í sumar.

Conteh var skammt frá því að bæta við fjórða markinu á 39. mínútu en hörkuskot hans fór framhjá. Adam Ægir Pálsson fékk síðan dauðafæri hinum megin en skaut yfir, einn og óvaldaður inni í teignum.

Keflvíkingar leiddu því 3-0 í hálfleik og voru líklegri til að bæta við í upphafi þess síðari en KA-menn að minnka muninn.

Gestirnir fengu þó von þegar hálftími var eftir. Eiður Orri Ragnarsson fékk þá sitt annað gula spjald fyrir leikaraskap eftir viðskipti við Andre Römer og var rekinn af velli.

Dómurinn var afar umdeildur enda virtist Römer snerta Eið áður en hann féll í grasið. Twana Khalid Ahmed, dómari leiksins, var þó ekki í vafa og Keflvíkingar þurftu að klára leikinn tíu.

KA-mönnum tókst ekki að nýta liðsmuninn og ógnuðu marki Keflavíkur lítið það sem eftir lifði leiks. Heimamenn sigldu öruggum 3-0 sigri í höfn og svöruðu umræðu síðustu daga inni á vellinum.

Sigurinn fleytir Keflavík upp í fimmta sæti með 22 stig. KA er í tíunda sæti með 15 stig, aðeins tveimur stigum frá botnsætinu.