Spá Fótbolta.net - 9. sæti: ÍBV

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ÍBV 35 stig
10. ÍA 33 stig
11. Keflavík 19 stig
12. Fram 17 stig

Um liðið: ÍBV er komið aftur upp í efstu deild eftir tveggja ára fjarveru. Liðið var næstbesta lið Lengjudeildarinnar í fyrra á eftir Fram, næst besta sóknin og þriðja besta vörnin ef markatalan er skoðuð. Í vetur hefur liðið styrkt sig og fékk t.a.m. einn úr nítján marka klúbbnum í sínar raðir, sá eini í þeim klúbbi sem er enn að spila. Liðið hefur þrisvar sinnum orðið Íslandsmeistari og fimm sinnum bikarmeistari.



Þjálfari - Hermann Hreiðarsson: Hemmi er mættur aftur til Vestmannaeyja eftir veru hjá Fylki, Kerala Blasters, Southend og Þrótti Vogum. Hemmi var spilandi þjálfari árið 2013 en ætlar að halda sér á hliðarlínunni í þetta skiptið. Hann er 47 ára og stýrði Þrótti Vogum til sigurs í 2. deild í fyrra. Hemmi er uppalin í Vestmannaeyjum og lék þar sín fyrstu ár í meistaraflokki áður en hann var keyptur til Crystal Palace árið 1997. Hemma til aðstoðar er Englendingurinn Dave Bell.

Styrkleikar: Mikil leikreynsla í lykilmönnum liðsins. Langflestir í liðinu hafa spilað í efstu deild og vita hvað til þarf til þess að halda sætinu í deildinni. Liðið er með markaskorara sem getur slegið markametið sitt og til baka eru þeir með einn besta miðvörð deildarinnar. Til að fullkomna hrygginn er liðið með reyndan mann á miðjunni sem leyfir ekkert kjaftæði. Hemmi og hans ástríða ættu einnig að vera styrkleiki en hann kann að búa til stemningu þar sem hann er.

Veikleikar: Óvissa með leikformið á Andra Rúnari sem hefur lítið spilað í vetur. Þá má setja spurningamerki við breiddina í hópnum í sumum leikstöðum en það má svo sem gera það hjá flestum liðum. Markmaðurinn Halldór Páll á ennþá almennilega eftir að sanna sig í efstu deild og er þetta líklega hans síðasta tækifæri til þess.

Lykilmenn: Eiður Aron Sigurbjörnsson og Guðjón Pétur Lýðsson. Fyrirliðinn er einn allra besti miðvörður deildarinnar. Hann tók skrefið niður í Lengjudeildina í fyrra en ætlaði sér að vera mættur í efstu deild ári seinna og það tókst. Hann er mikill leiðtogi og kann leikinn upp á tíu. Það verða alltaf mörg augu á Guðjóni Pétri, hann er duglegur að láta menn heyra það og heldur mönnum við verkið. Hann er leikreyndur og þekkir eins og Eiður hvað til þarf til að ná árangri í efstu deild.

Hlaðvarpsþátturinn Ungstirnin mælir með: Tómas Bent Magnússon. Hann er uppalinn Eyjamaður fæddur árið 2002 og hefur verið hluti af meistaraflokki ÍBV síðan 2019. Miðjumaðurinn var í lykilhlutverki þegar ÍBV tryggði sér sæti í deild þeirra bestu síðasta sumar, lék tuttugu leiki og skoraði eitt mark. Hann æfði með U19 síðasta vetur og með góðri frammistöðu í sumar gæti hann gert tilkall í sæti í U21 landsliðshópnum. Hann er búinn að bæta sig mjög mikið í vetur og verður spennandi að sjá hann í efstu deild. Hann er með mikla hlaupagetu, virkilega góður að vinna boltann, skilar hlaupum inn í teig og er öflugur skallamaður.

Spurningarnar: Formið á Andra Rúnari? Er Halldór Páll nægilega öflugur í efstu deild? Getur Sito stutt við Andra Rúnar í markaskorun? Hver verður við hlið Eiðs Arons í miðverðinum?

Völlurinn: Síðasta árið þar sem er gras á Hásteinsvelli? Hann þarf að vera vígi í sumar ef liðið ætlar að gera atlögu að sæti í efri helmingi deildarinnar. ÍBV var frábært á útivelli í fyrra en eingungis fjórða besta heimaliðið. Árið 2019 fékk ÍBV öll sín tíu stig á heimavelli.

Fyrirliðinn segir - Eiður Aron Sigurbjörnsson
„Það væri ekki ásættanlega niðurstaða að enda í 9. sæti. Við ætlum hærra en það. Við erum nýliðar í deildinni og kemur ekki á óvart að okkur sé spáð 9. sæti. Við erum alveg með okkar markmið um hvað við ætlum að gera og það er eitthvað ofar en 9. sætið, við förum hærra en það og verðum helvíti fúlir með sjálfa okkur ef sú spá rætist. Við höfum bara rætt okkar á milli um markmið. Það er bara þetta gamla góða að við tökum bara leik fyrir í einu og svo er hægt að ræða þetta aðeins betur þegar líður á mótið."

Komnir
Alex Freyr Hilmarsson frá KR
Andri Rúnar Bjarnason frá Danmörku
Guðjón Orri Sigurjónsson frá KR
Halldór Jón Sigurður Þórðarson frá Víkingi R.
Marc Wilson frá Þrótti Vogum

Farnir
Bjarni Ólafur Eiríksson hættur
Breki Ómarsson
Gonzalo Zamorano í Selfoss
Seku Conneh til Bandaríkjanna
Stefán Ingi Sigurðarson til Breiðabliks (var á láni)

Fyrstu fimm leikir ÍBV:
19. apríl Valur - ÍBV
24. apríl ÍBV - KA
1. maí ÍBV - Leiknir
7. maí Keflavík - ÍBV
11. maí ÍBV - KR

Hin hliðin:
Guðjón Ernir Hrafnkelsson
Sigurður Arnar Magnússon

Sterkasta byrjunarliðið að mati Fótbolta.net:


Aðrir leikmenn:
Guðjón Orri Sigurjónsson - 1
Óskar Elías Zoega Óskarsson - 24
Marc Wilson - 20
Jón Ingason - 5
Nökkvi Már Nökkvason - 4
Telmo Castanheira - 8
Halldór Jón Sigurður Þórðarson - 28
Sigurður Grétar Benónýsson - 11
Jón Jökull Hjaltason - 6
Eyþór Daði Kjartansson - 18
Róbert Aron Eysteinsson - 17
Eyþór Orri Ómarsson - 12
Arnar Breki Gunnarsson - 14

Spámennirnir: Aksentije Milisic, Brynjar Ingi Erluson, Egill Sigfússon, Elvar Geir Magnússon, Guðmundur Aðalsteinn Ásgeirsson, Hafliði Breiðfjörð, Sverrir Örn Einarsson, Sæbjörn Þór Þórbergsson Steinke, Tómas Þór Þórðarson og Úlfur Blandon