Ítalía: Bjarki Steinn með mikilvægt mark í umspilinu

Bjarki Steinn Bjarkason er búinn að vinna sér inn byrjunarliðssæti hjá ítalska C-deildarliðinu Foggia og skoraði hann mikilvægt mark í umspilsleik á dögunum.

Foggia tók á móti Pescara í undanúrslitaleik um sæti í B-deildinni og var staðan jöfn 1-1 í hálfleik.

Gestirnir úr Pescara tóku forystuna í upphafi síðari hálfleiks en Bjarki Steinn kom sínum mönnum til bjargar með jöfnunarmarki á 60. mínútu.

Lokatölur urðu 2-2 og mætast liðin aftur á heimavelli Pescara á fimmtudaginn. Til gamans má geta að Pescara sló meðal annars Emil Hallfreðsson og félaga í Virtus Verona úr leik á leið sinni í undanúrslitaleik umspilsins.

Sigurvegarinn mætir annað hvort Lecco eða Cesena í úrslitaleik um sæti í B-deildinni.