Þorsteinn Halldórsson
Sveindís Jane klúðraði dauðafæri fyrir Ísland í leiknum en hún eins og liðsfélagar hennar tóku úrslitin verulega nærri sér og skiljanlega.
Stemningin var þung inn í klefa eftir leik
Þorsteinn Halldórsson, þjálfari íslenska kvennalandsliðsins, var auðvitað súr með 1-0 tapið gegn Hollendingum í kvöld en að nú skipti máli hvernig er brugðist við úrslitunum.
Lestu um leikinn: Holland 1 - 0 Ísland
Ísland varðist vel í leiknum og sérstaklega í síðari hálfleik en það var með ólíkindum hvernig Holland fór ekki með forystu inn í hálfleikinn eftir þrjú sláarskot og eitt bjargað á línu.
Leikurinn var lokaðri í þeim síðari og gerði íslenska liðið betur þar en eftir margar fyrirgjafir Hollendinga heppnaðist ein þeirra og það á þriðju mínútu í uppbótartíma.
Þetta þýðir að Ísland þarf að fara í umspil. Þorsteinn var svekktur eftir leikinn.
„Algjörlega. Við náðum að hanga á þessu og sérstaklega í fyrri hálfleik þar sem við vorum meira í basli en í seinni hálfleik. Þær fengu færi í seinni hálfleik líka en voru í erfiðleikum með að skapa opin færi, einhverjir skallar úr teignum og tvö eða þrjú skotfæri en voru ekkert að opna okkur kannski eins og þær voru að gera í fyrri hálfleik á köflum. Þær voru að taka lengri 'crossa' og taka þá lengra frá og við áttum meira í basli með að halda í boltann í seinni hálfleik en sköpuðum fínt færi og allt það en mikil vonbrigði að fá á sig mark á þessum tíma," sagði Þorsteinn við fjölmiðla.
Hann gerði eina breytingu í hálfleiknum. Selma Sól Magnúsdóttir kom inn þá inn fyrir Svövu Rós.
„Ég vildi fá meira lokað þannig þær næðu ekki að tvöfalda meira á vængjunum. Vinna í tvöfölduninni þar og fá flata miðju og stíga upp og leyfa hafsentunum að vera með boltann. Þær voru að senda á milli og senda þversendingar en ekkert að skapa neitt hættulegt."
Stemningin inn í klefa eftir leik var þung og viðurkenndi hann það en nú er spurning hvernig er brugðist við mótlætinu.
„Stemningin er þung og þungt að tapa leik á þessu mómenti. Því við þurftum bara að hanga í 90 sekúndur í viðbót og auðvitað þungt þegar þú færð svona kjaftshögg og þá snýst þetta um það hvernig þú bregst við og hvernig þú tekst á við það og viðbrögðin við því en ég hef enga trú á öðru en að þetta eru alvöru íþróttamenn og íþróttakonur sem bregðast við á þann hátt sem þarf að bregðast við og klár í umspilið og klára það."
Sveindís Jane Jónsdóttir fékk besta færi Íslands í leiknum þegar tuttugu mínútur voru eftir en hún hitti ekki boltann fyrir framan mark Hollendinga.
„Já, þetta var fínt færi. Í níu af hverjum tíu færum skorar hún en því miður var þetta eitt af þeim skiptum þar sem það gekk ekki og auðvitað segja Hollendingarnir það sama eftir leikinn. Auðvitað áttu þeir að nýta eitthvað af þessum færum í fyrri hálfleik en þetta er partur af því hvað íþróttin getur verið skemmtileg en helvíti dramatísk."
Nú tekur við umspil í október en Ísland mun spila einn leik þann 11. október. Dregið er á föstudag.
„Það er eina leiðin. Við ætluðum okkur að fara í úrslitaleik við Holland og það var það sem tókst en við ætluðum okkur að fara áfram og það eru gríðarleg vonbrigði. Þetta eru úrslit sem við þurfum að una við."
„Samkvæmt síðustu spilum við bara einn leik 11. og ef við vinnum hann förum við áfram en ef við gerum jafntefli venjulegum leiktíma en sýnist staðan vera þannig eins og hún er núna," sagði hann í lokin.
