Thiago Pitarch í leik með Real Madrid
Spænski miðjumaðurinn Thiago Pitarch skrifaði nafn sitt í sögubækur Real Madrid með því að byrja gegn Bayern München í 8-liða úrslitum Meistaradeildarinnar í kvöld.
Þessi 18 ára gamli Spánverji var óvænt valinn í byrjunarliðið hjá Madrídingum fram yfir Jude Bellingham í kvöld.
Pitarch hefur fengið tækifærin á þessu tímabili og hefur Alvaro Arbeloa, þjálfari liðsins, verið að taka hann fram yfir Eduardo Camavinga síðasta mánuðinn.
Í kvöld setti hann met þegar hann varð yngsti leikmaðurinn til að byrja leik fyrir Real Madrid í 8-liða úrslitum Meistaradeildarinnar, en hann bætti met Raúl sem stóð í 30 ár.
Í síðasta mánuði varð hann yngstur til að byrja leik í útsláttarkeppni Meistaradeildarinnar og því í annað sinn sem hann tekur met af Raúl á stuttum tíma.
Real Madrid er að tapa fyrir Bayern, 1-0, á Bernabeu en Luis Díaz gerði markið undir lok fyrri hálfleiks.
