Lengjudeildin: Valdimar afgreiddi Ægi

Ægir og Njarðvík áttust við í eina leik kvöldsins í Lengjudeildinni og var Valdimar Jóhannsson ekki lengi að brjóta ísinn fyrir gestina. Varnarmenn heimamanna gleymdu sér, gáfu honum alltof mikinn tíma á boltanum svo hann skoraði strax á þriðju mínútu.

Gestirnir úr Njarðvík voru sterkari aðilinn en það var lítið um færi í nokkuð lokuðum fyrri hálfleik. Staðan var 0-1 í leikhlé og jafnaðist leikurinn út í síðari hálfleik.

Ægismenn sýndu fína takta en náðu ekki að skapa gott færi í afar lokuðum leik. Markið hans Valdimars reyndist nóg til að tryggja Njarðvíkingum dýrmæt stig.

Njarðvík er núna með 26 stig eftir 16 umferðir, situr í fimmta sætinu (umspilssæti) og er fimm stigum á eftir toppliði Aftureldingar sem á tvo leiki til góða. Ægir situr áfram á botninum með 8 stig.