Viðureign AC Milan og Juventus var stórfurðuleg er liðin mættust fyrr í kvöld.

Staðan var markalaus eftir nokkuð jafnan fyrri hálfleik en Adrien Rabiot og Cristiano Ronaldo skoruðu tvö fyrir Ítalíumeistara Juve í upphafi síðari hálfleiks.

Rabiot skoraði glæsilegt mark eftir frábært einstaklingsframtak og tvöfaldaði Ronaldo forystuna eftir frábæra sendingu innfyrir vörnina frá Juan Cuadrado.

Zlatan Ibrahimovic minnkaði muninn á 62. mínútu þegar hann skoraði úr vítaspyrnu, sem var dæmd eftir að boltinn fór í hönd Leonardo Bonucci innan teigs.

Skömmu síðar labbaði Franck Kessie í gegnum vörn Juve og jafnaði leikinn. Rúmri mínútu eftir það var Rafael Leao búinn að snúa stöðunni við með þriðja marki Milan.

Heimamenn voru þó ekki búnir því Ante Rebic fullkomnaði endurkomuna á 80. mínútu eftir slæm mistök Alex Sandro sem gaf boltann frá sér í vörn.

Það voru því sex mörk skoruð í seinni hálfleik og komu fjögur mörk Milan á tæplega tuttugu mínútna kafla.

Juve er áfram með sjö stiga forystu á toppi Serie A. Sigurinn er mikilvægur fyrir Milan sem er í harðri baráttu um Evrópusæti.

Það getur tekið tíma fyrir stöðutöfluna að uppfærast.