Einnig gjaldgeng fyrir Holland – „Alltaf langað að spila fyrir Ísland“

Líf, sem varð 19 ára í gær, er nýliði í hópnum. Hún er fjölhæfur leikmaður sem hefur spilað mjög vel með Breiðabliki, toppliði Bestu deildarinnar, í sumar.

„Ég er búin að vera að stefna að þessu frá því ég var lítil, þetta hefur verið draumur frá því ég var fimm ára."

Það er ekki síður skemmtilegt að eiga afmæli í fyrsta landsliðsverkefninu. Það var sungið fyrir Líf á æfingu í gær og svo var kaka um kvöldið.

„Við fengum köku svo í kvöldmatinn, afmælisköku og það var sungið líka þá. Tveir afmælissöngvar," sagði Líf og brosti.

Búin að jafna mig
Líf hefur átt mjög gott sumar með Breiðabliki og fengið stærra hlutverk í liðinu. Í síðasta leik fyrir landsleikjaverkefni unnu Blika 5-4 sigur á Þrótti í ótrúlegum leik.

„Ég er búin að jafna mig. Þetta var svakalegur leikur. Góð þrjú stig og mikilvæg. Við erum efstar núna og vonandi helst það þannig," sagði Líf en það er möguleiki á því að Breiðablik og FH mætist í uppgjöri um Íslandsmeistaratitilinn í lokaumferð deildarinnar.

„Það er mikilvægt að vera þremur stigum á undan FH þegar það eru tveir leikir eftir."

Kom ekki til greina að spila fyrir Holland
Eins og eftirnafnið gefur til kynna á Líf ættir að rekja til Hollands en faðir hennar, Joost van Bemmel, kemur þaðan. Hún segir þó að það hafi ekki annað komið til greina en að spila fyrir Ísland.

„Pabbi er hollenskur þannig að ég er hálf hollensk," sagði Líf.

„Ég hef alltaf búið á Íslandi og mig hefur alltaf langað að spila fyrir Ísland."

Allt viðtalið má sjá í spilaranum hér að ofan.