Skipti Madríd út fyrir Newcastle - „Alltaf langað í enska boltann“

„Við erum búnar að fara á tvær æfingar og það hefur gengið vel. Við höfum farið yfir hluti sem við ætlum að gera í leiknum og svoleiðis."

Ísland er langt fyrir ofan Króatíu á heimslistanum og er mun líklegra liðið fyrir þetta einvígi.

„Við eigum að vera betri en þær en við þurfum að mæta í leikinn og spila okkar besta leik. Þú getur ekki mætt með hálfan haus, þú verður að mæta 100%"

Skipti út Madríd fyrir Newcastle
Hildur yfirgaf spænska félagið Madrid CFF í sumar og gekk í raðir Newcastle á Englandi. Kvennalið Newcastle er á uppleið en liðið hefur unnið fyrstu fimm leiki sína í næst efstu deild Englands á þessu tímabili.

„Það tekur sinn tíma að venjast nýjum aðstæðum, en ég er búin að njóta mín og liðið er mjög gott. Stelpurnar eru skemmtilegar," sagði Hildur en það er nú ágætis tilbreyting að færa sig úr sólinni í Madríd yfir í kalda norðrið á Englandi.

„Það er náttúrulega mjög mikil tilbreyting, en Newcastle hefur komið á óvart. Hún er miklu flottari en ég bjóst við. Ekki alveg eins og Madríd, en samt flott."

Hún er búin að koma sér vel fyrir á nýjum slóðum. „Þetta hefur tekið sinn tíma. Bretarnir eru smá tregir með allt. En ég hef komið mér vel fyrir núna."

Það er skemmtilegt að fá að upplifa það að spila í enska boltanum.

„Mig hefur alltaf langað í enska boltann. Þegar þetta kom upp, þá hugsaði ég að þetta væri tækifærið mitt til að fara þangað. Kvennaboltinn er á rosalega mikilli uppleið á Englandi og það er gaman að vera partur af því," sagði Hildur að lokum.