Óli Kristjáns: Ég er bara ánægður að vinna leik

„Ég er bara ánægður með að vinna leik, við erum búnir að vera í brasi með að vinna leik í deild undanfarið. Það er engin launung að það setur aukna pressu á okkur og í bili er þeirri pressu létt af okkur þangað til í næsta leik. Mér fannst miðað við erfiðið og taktinn í leikinn að ná marki úr föstu leikatriði virkilega sætt og sitja eftir leik með 3 stig."

Davíð Þór Viðarsson og Steven Lennon hafa verið að glíma við meiðsli í upphafi móts en eru farnir að spila. Ólafur hrósar Davíð sérstaklega fyrir að spila eins og herforingi þrátt fyrir að vera enn að glíma við hnémeiðsli. Kristinn Steindórsson meiddist á æfingu og var þess vegna ekki með í kvöld að sögn Ólafs.

„Frábært að fá þá inn í liðið, Davíð sýnir frábæran karakter þegar liðið þarf á því að halda og stígur upp. Hann er ekki góður í hnéinu en hann lætur sig hafa það og spilar eins og herforingi. Lennon er líka búinn að fá fleiri og fleiri mínútur eftir að hafa verið í brasi í upphafi móts þannig að það er ágætis gangur í því. Kristinn datt á öxlina og tognaði á æfingu á laugardaginn og var ekki klár í leikinn í dag.