Lengjudeildin: Diouck sökkti Vestra - Tvö vítamörk í jafntefli á Seltjarnarnesi

Vestri fékk algjöra draumabyrjun. Liðið vann boltann framarlega og Johannes Selvén mundi skotfótinn fyrir utan teig. Hann lét vaða og Guy Smit kom engum vörnum við.

Breki Þór Hermannsson fékk dauðafæri til að tvöfalda forystuna á tíundu mínútu þegar hann slapp einn í gegn en Smit sá við honum. Stór og mikilvæg varsla hjá Hollendingnum.

Njarðvíkingar sóttu í sig veðrið eftir því sem leið á hálfleikinn og jöfnuðu fyrir hlé.

Alexander Helgi Sigurðarson kom boltanum á Valdimar Jóhannsson sem hafði varnarmann í bakinu. Valdimar sneri af sér mótherjann, klobbaði Edson og slapp í gegn áður en hann lagði boltann snyrtilega fram hjá Marvin Darra Steinarssyni.

Oumar Diouck gerði síðan út um leikinn með tveimur mörkum um miðjan síðari hálfleik.

Hann skoraði fyrra markið á 64. mínútu eftir fyrirgjöf Braga Karls Bjarkasonar. Skömmu síðar tók Diouck vel á móti boltanum með varnarmann í bakinu, sneri og kláraði færið af öryggi.

Framherjinn gerði gæfumuninn og tryggði Njarðvík 3-1 sigur. Liðið fer upp í fjórða sæti með 29 stig en Vestri er í áttunda sæti með 21 stig.

Jafnt á Nesinu

Grótta og Þróttur skildu jöfn, 1-1, á Vivaldi-vellinum á Seltjarnarnesi.

Fyrri hálfleikurinn var fremur jafn en Grótta komst yfir úr vítaspyrnu. Kári Kristjánsson fór í hælinn á Kristófer Dan Þórðarsyni og hinn 16 ára gamli Mattías Kjeld skoraði af öryggi af punktinum. Þetta var tíunda deildarmark hans í sumar.

Þróttarar fengu síðan vítaspyrnu þegar hálftími var eftir eftir brot Gríms Inga Jakobssonar. Kári bætti upp fyrir brotið í fyrri hálfleiknum og jafnaði metin.

Þróttur var hættulegri á lokakaflanum en tókst ekki að nýta nokkur ágæt færi. Grótta fékk einnig færi í gegnum Björgvin Brima Andrésson, en Þórhallur Ísak Guðmundsson varði frá honum.

Lokatölur urðu því 1-1. Þróttur er í öðru sæti með 34 stig og missti af tækifærinu til að komast á toppinn. Grótta situr í sjötta sæti með 26 stig.

Grótta 1 - 1 Þróttur R.
1-0 Mattías Kjeld ('25 , víti)
1-1 Kári Kristjánsson ('62 , víti)
Lestu um leikinn

Njarðvík 3 - 1 Vestri
0-1 Johannes Selvén ('1 )
1-1 Valdimar Jóhannsson ('45 )
2-1 Oumar Diouck ('64 )
3-1 Oumar Diouck ('74 )
Lestu um leikinn