Lampard um Man City: Ég hef mín eigin vandamál

Man City var fundið sekt um alvarleg brot á fjárhagsreglum ensku úrvalsdeildarinnar en neitar áfram sök og hefur áfrýjað niðurstöðu óháðrar nefndar deildarinnar.

Meðal refsinga sem hafa verið nefndar eru að svipta félagið titlum, fella það um deild, draga af því stig, setja það í félagaskiptabann og sekta það. Lampard var spurður út í málið á fréttamannafundi og sagði erfitt að taka frá leikmönnum það sem þeir hefðu lagt svo mikið á sig til að vinna.

„Ég hef enga skoðun á þessu eins og staðan er núna. Ég hef unnið titla en þeir hanga ekki á veggnum heima hjá mér. Ég geymi þá í kollinum.“

„Leikmenn hafa lagt hart að sér og barist við þá bestu til að vinna. Það verður því erfitt að taka titlana af þeim, því þeir lifa í minningunni frekar en í einhverjum glerskáp,“ sagði Lampard.

Hann lék sjálfur með Man City tímabilið 2014-2015, á því tímabili sem brotin ná til, eftir að hafa yfirgefið Chelsea. Hann var spurður hvort það hefðu verið forréttindi að taka þátt í verkefni sem svo miklu fé var varið í.

„Ég hugsaði aldrei um það þannig. Ég var 36 ára og fékk tækifæri til að fara til New York eftir að ég fór frá Chelsea. Svo kom Man City til sögunnar og ég var í skýjunum yfir því að geta farið til meistaranna á þessum aldri og spilað. Það var hugsað mjög vel um mig.“

Lampard vann þrettán titla með Chelsea og þekkti því vel umræðuna um að kaupa sér velgengni. Roman Abramovich eignaðist félagið árið 2003 og lagði mikið fé í reksturinn og leikmannakaup.

„Ég var hjá Chelsea í þrettán ár og eftir að Roman Abramovich kom sögðu allir að við hefðum keypt titilinn og allt það. En við unnum samt Manchester United með Paul Scholes, David Beckham og Wayne Rooney.“

„Þegar þú ert leikmaður og keppir að einhverju hugsarðu bara um að vinna. Við vorum heppnir að geta gert það saman hjá Chelsea.“

Lampard vildi að öðru leyti lítið tjá sig um málið á meðan áfrýjun City er til meðferðar.

„Þetta eru umræður sem ég vil ekki taka þátt í. Sem leikmaður einbeitti ég mér að því að spila með frábærum liðsfélögum og tíminn hjá City Football Group var mjög áhugaverður fyrir mig.“

„Man City hefur áfrýjað niðurstöðunni og ég get lítið tjáð mig á meðan það ferli stendur yfir. Það er langt síðan ég spilaði með City og ég var þar í eitt ár. Bíðum og sjáum hver niðurstaðan verður.“

„Ég stend utan við þetta. Ég hef mínu starfi að sinna og mín eigin vandamál. Það er ekki mitt hlutverk að tala um refsingar,“ sagði Lampard.