Lengjudeildin: Elfar Árni hetja Völsungs

Völsungur vann sterkan endurkomusigur á HK í Lengjudeildinni í dag.

Heimamenn byrjuðu leikinn betur. Tómas Bjarni Baldursson náði forystunni fyrir Völsung eftir stundafjórðung. Arnþór Ari Atlason jafnaði metin fyrir HK undir lok fyrri hálfleiksins þegar hann setti boltann í netið eftir sendingu fyrir markið frá Atla Þór Gunnarssyni.

Tumi Þorvarsson kom síðan HK yfir snemma í seinni hálfleik. Völsungur var ekki lengi að svara því Inigo Albizuri Arruti jafnaði metin þegar hann skoraði með skalla eftir hornspyrnu.

Þremur mínútum síðar skoraði Elfar Árni Aðalsteinsson og kom Völsungi yfir.

Elfar Árni var nálægt því að innsigla sigurinn í blálokin en skaut í stöngina. Það kom ekki að sök þar sem Völsungur vann gríðarlega sterkan sigur.

Völsungur er í 11. sæti með 14 stig, þremur stigum frá öruggu sæti. HK er í 5. sæti með 28 stig.