Stefan Ljubicic beint af Samsung á bráðamóttöku - Fjögur spor saumuð

Stefan Alexander Ljubicic, framherji Keflavíkur, meiddist snemma leiks gegn Stjörnunni í gær. Hann meiddist strax á þriðju mínútu, boltinn kom á lofti eftir innkast og Stefan sendi hann áfram á lofti. Jóhann Árni Gunnarsson, leikmaður Stjörnunnar, reyndi að komast fyrir en með þeim afleiðingum að hann fór í löppina á Stefani. Brot var dæmt en Jóhann Árni slapp án þess að fá spjald.

Stefan lá eftir, fékk aðhlynningu og beit svo á jaxlinn og harkaði áfram þar til á 59. mínútu þegar hann varð að fara af velli.

Stefan fór í kjölfarið beint af Samsungvellinum og á bráðamóttökuna, þar var gert að skurðinum og fjögur spor saumuð.