Willum spilaði í tapi GAE - Þriðji leikurinn í röð án sigurs
Mynd: Go Ahead Eagles
Mynd: Go Ahead Eagles
Íslenski landsliðsmaðurinn Willum Þór Willumsson var í byrjunarliðinu að vanda hjá Go Ahead Eagles en liðið tók á móti Utrecht í hollensku úrvalsdeildinni í hádeginu í dag.
Willum spilaði allan leikinn í 0-2 tapi en liðinu hefur gengið illa að finna sigra að undanförnu. Þetta var þriðji leikurinn í röð án sigurs hjá Go Ahead Eagles en liðið er í sjötta sæti deildarinnar.
Sigur í dag hefði komið liðinu upp fyrir Ajax og í fimmta sætið en það varð ekki raunin. Lið Ajax hefur verið að rétta mikið úr kútnum en stutt er síðan liðið var í fallbaráttu.
Victor Jensen og Bart Ramselaar sáu um að klára leikinn fyrir gestina í Utrecht en þeir eru í ellefta sæti deildarinnar.
