„Við gerum allt til að vernda rétt landsliðsins. Við erum ekki börn," sagði Hussein Jenaieh, stjórnarmaður hjá fótboltasambandi Túnis.

Ljóst er að uppbótartíminn í leiknum hefði átt að vera þónokkur enda voru skiptingar í hálfleiknum, tveir vítadómar, rautt spjald, farið í VAR skjáinn og vatnspása vegna hita.

Rúmlega 20 mínútum eftir leikinn var reynt að spila síðustu mínúturnar en fjórði dómari leiksins átti þá að taka við sem aðaldómari. Malí mætti út á völlinn en ekki Túnis.

„Dómarinn fékk sólsting sem hafði áhrif á ákvarðanir hans í leiknum. Eftir leikinn þurfti hann að fara á spítala því það var svo mikill hiti," sagði Essam Abdul Fattah hjá dómarasambandi Afríku.

„Það er ekki í boði að þetta gerist á þessu stigi leiksins í Afríku. Afrískur fótbolti getur ekki haldið áfram svona. Dómarinn skalf í dag. Hann hikaði meira að segja þegar hann ætlaði að skoða VAR skjáinn, hann vissi ekki hvernig hann kæmist í skjáinn," sagði Jalel Kadri, aðstoðarþjálfari Túnis.

Afríska fótboltasambandið segist vera að safna gögnum og geti ekki tjáð sig frekar um málið á meðan það er í skoðun.