Lengjudeild kvenna: Sjö mörk á Seltjarnarnesi

Grótta hafði sigur gegn Keflavík, 4-3, í háspennuleik í Lengjudeild kvenna á Vivaldi-vellinum á Seltjarnarnesi í dag.

Katrín Rut Kvaran kom Gróttu á bragðið á 7. mínútu eftir gott samspil.

Bæði lið fengu fullt af færum á fyrstu 25 mínútunum og í raun ótrúlegt að staðan hafi aðeins verið 1-0 á þeim tímapunkti. Undir lok fyrri hálfleiks tókst Keflavík að jafna þegar Hilda Rún Hafsteinsdóttir nýtti sér skoppandi bolta í teignum og tók hann á lofti og stýrði í samskeytin.

Aðeins fáeinum mínútum síðar kom Ariela Lewis gestunum yfir er Keflavík vann boltann á miðjunni, honum komið inn á Arielu sem vippaði yfir markvörðinn og í netið.

Grótta svaraði strax í upphafi síðari hálfleiks. Katrín Rut með annað mark sitt er hún hirti frákast í teignum og náði Thelma Björg Gunnarsdóttir að snúa við taflinu ellefu mínútum síðar sem kláraði í nærhornið.

Díana Ásta Guðmundsdóttir náði í mikilvægt fjórða mark Gróttu á 80. mínútu. Lovísa Davíðsdóttir Scheving fékk boltann, kom honum á Díönu sem setti boltann í markið.

Alyssa Yana Daily veitti Keflavík líflínu á 87. mínútu. Margrét hljóp út úr marki Gróttu, en Olivia Madeline Simmons náði að pota boltanum á Alyssu sem skoraði.

Fleiri urðu þó mörkin ekki og var það Grótta sem fagnaði mikilvægum sigri. Grótta fer upp í annað sæti deildarinnar með 15 stig, einu stigi frá toppliði Hauka, en Keflavík i 6. sæti með 7 stig.