Byrjunarlið Íslands - Jói Berg, Kristian og Andri byrja í Bakú

Búið er að staðfesta byrjunarlið Íslands gegn Aserbaísjan en Jóhann Berg Guðmundsson mun byrja í sínum 100. landsleik eins og greint hafði verið frá.

Kristian Hlynsson kemur einnig inn í byrjunarliðið, Logi Tómasson hefur verið veikur og er ekki klár í að byrja svo Mikael Egill Ellertsson verður í bakverði. Andri Lucas Guðjohnsen kemur inn eftir að hafa verið í leikbanni í jafnteflinu gegn Frakklandi.

Frá Frakkaleiknum fara því Logi, Sævar Atli Magnússon (meiddur) og Daníel Tristan Guðjohnsen úr liðinu. Inn koma Jói Berg, Kristian og Andri.

Ísland þarf sigur í kvöld til að vera öruggt með úrslitaleik gegn Úkraínu í lokaumferðinni á sunnudaginn, um sæti í umspilinu. Ef Úkraína tapar gegn Frakklandi mun Íslandi þá nægja jafntefli í þeim leik.