Meiðslabras á HK

„Brynjar er á leið í aðgerð í næstu viku, þetta tengist mjöðminni. Róbert Quental kom sprækur inn til okkar frá Leikni en svo hefur hann verið frá síðustu vikur vegna meiðsla í hné. Hann er á leið til bæklunarlæknis í skoðun til að sjá hvað sé að hrjá hann," segir Gunnar Heiðar Þorvaldsson sem er þjálfari HK.

Þorvaldur Smári Jónsson kom þá meiddur úr verkefni með U19 landsliðinu og verður eitthvað frá.

HK hefur ekki getað teflt fram sama byrjunarliði tvo leiki í röð í mótinu. Það eru þó einhverjar jákvæðar fréttir. Arnþór Ari Atlason, fyrirliði liðsins, er að komast almennilega af stað eftir að hafa slitið liðbönd í ökkla skömmu fyrir mót.

„Það er ánægjulegt að Arnþór kláraði síðasta leik, fyrsti leikurinn sem hann klárar. Svo hafa verið minni meiðsli hjá mönnum sem hefur gert það að verkum að við höfum ekki alveg náð takti," segir þjálfarinn.