Spánn: Aftur skoraði nýi maðurinn seint sigurmark

Carlos Espi var aftur hetjan en það var Kylian Mbappe sem lagði upp markið

Mynd: EPA

Carlos Espi var aftur hetjan en það var Kylian Mbappe sem lagði upp markið

Mynd: EPA

Real Madrid vann sinn fimmta leik í La Liga á tímabilinu þegar liðið lagði Elche 3-2, en Madrídingar þurftu svo sannarlega að hafa fyrir stigunum þremur.

Madrídingar gátu varla beðið um mikið betri byrjun. Á 25. mínútu fengu þeir aukaspyrnu sem Arda Güler skaut í stöng. Boltinn fór þaðan í Matias Dituro, markvörð Elche, og í netið á meðan hann stóð hreyfingarlaus.

Kylian Mbappe var næstur á blað og kom Real Madrid í 2-0 á 33. mínútu. Þetta var fjórði deildarleikurinn sem hann skorar í á tímabilinu og sjöunda deildarmark hans.

Kannski töldu einhverjir að þar með væri leikurinn búinn en Elche sýndi að svo var ekki. Abiel Osorio minnkaði muninn með skalla á 71. mínútu eftir að Lucas Capeda hafði komið sér framhjá Trent Alexander-Arnold og sent frábæran bolta inn á teiginn. Osorio stýrði boltanum undir Thibaut Courtois og í netið.

Jöfnunarmarkið kom tólf mínútum síðar eftir laglegt samspil heimamanna. Boltinn endaði hjá Fer Nino sem skaut honum meðfram grasinu og í fjærhornið.

Real Madrid átti þó eitt spil eftir á hendi og aftur var það Carlos Espi. Hann tryggði Madrídingum sigur gegn Espanyol í ágúst og endurtók leikinn nú þegar hann kom inn á á 87. mínútu og skoraði sigurmarkið í uppbótartíma eftir sendingu frá Mbappe.

Mbappe slapp inn fyrir og sá Espi sér við hlið. Í stað þess að reyna sjálfur lagði hann boltann til hliðar og Espi rúllaði honum í autt markið.

Espi kom til Real Madrid frá Levante fyrir 25 milljónir evra í sumar og hefur nú skorað tvö deildarmörk fyrir félagið. Bæði hafa reynst gríðarlega mikilvæg.

Real Madrid er í 2. sæti með 15 stig eftir sex leiki, jafnmörg og Barcelona sem á leik til góða. Elche situr á botninum með tvö stig.

Alaves 0 - 1 Valencia
0-1 Luis Rioja ('78 )

Elche 2 - 3 Real Madrid
0-1 Matias Dituro ('25 , sjálfsmark)
0-2 Kylian Mbappe ('33 )
1-2 Abiel Osorio ('71 )
2-2 Fer Nino ('83 )
2-3 Carlos Espi ('90 )

Rayo Vallecano 2 - 1 Espanyol
1-0 Alvaro Garcia ('3 )
2-0 Adria Pedrosa ('26 )
2-1 Roberto Fernandez ('54 )
Rautt spjald: Omar El Hilali, Espanyol ('90)

Stöðutafla

#	Lið	L	mun	Stig
1	Barcelona	5	+17	15
2	Real Madrid	6	+11	15
3	Betis	5	+1	12
4	Alaves	6	+5	10
5	Atletico Madrid	5	+4	10
6	Sevilla	5	+2	10
7	Deportivo	5	+3	9
8	Espanyol	6	+2	7
9	Athletic	5	+1	7
10	Racing Santander	5	0	7
11	Osasuna	5	-3	7
12	Real Sociedad	6	-5	7
13	Vallecano	6	-5	7
14	Levante	5	-2	5
15	Getafe	5	-3	5
16	Celta	6	-3	4
17	Valencia	6	-8	4
18	Malaga	5	-6	3
19	Villarreal	5	-3	2
20	Elche	6	-8	2