Vanmetnasti leikmaður landsins?

„Hún er að mínu mati besti miðjumaður deildarinnar."

Gekk til liðs við Val á miðju síðasta tímabili
Lára ólst upp hjá Aftureldingu en fór í Stjörnuna árið 2014 þar sem hún sýndi það og sannaði að hún væri einn besti miðjumaður landsins.

Hún lék með Þór/KA 2019 og KR árið eftir, en í febrúar 2021 fór hún til ítalska stórliðsins Napoli.



Fyrir rúmu ári síðan bárust svo þau tíðindi að Lára væri á leið í Val en sú ákvörðun hefur svo sannarlega borgað sig fyrir Hlíðarendafélagið. Lára hefur spilað algjört lykilhlutverk í liði Vals frá því hún kom aftur heim til Íslands.

Frammistaða hennar eftir að hún kom heim var stór ástæða fyrir því að Valur landaði þeim stóra - Íslandsmeistaratitlinum - á síðustu leiktíð og í sumar hefur hún stigið enn frekar upp - ef eitthvað er - í stórkostlegum árangri Vals.



Best í því að senda boltann upp völlinn
Það er áhugavert að skoða tölfræðina því hún segir sýna sögu, svo sannarlega.

Samkvæmt tölfræði frá WyScout telja þær 21 sem hafa spilað eitthvað djúpt á miðju og alls yfir 1000 mínútur heilt yfir í Bestu deild kvenna í sumar.

Af öllum þessum leikmönnum er Lára með flestar sendingar að meðaltali í leik eða 56,51. Hún er þá með næstbesta sendingarhlutfallið en aðeins Natasha Moraa Anasi úr Breiðablik er með betra hlutfall.


Þeir miðjumenn sem eru með besta sendingarhlutfallið í deildinni í sumar.

Í 85 prósent tilvika hefur Natasha hins vegar leikið sem miðvörður í sumar frekar en miðjumaður. Lára hefur hins vegar spilað í 100 prósent tilfella á miðsvæðinu þar sem er oftast meiri traffík.

Það er rosalega auðvelt sem miðjumaður að senda til baka og til hliðar, en það er of sjaldgæfur eiginleiki að horfa upp völlinn.

Það er aftur á móti eiginleiki sem Lára býr svo sannarlega yfir.


Úr leik gegn Þór/KA þar sem 27 af 69 sendingartilraunum Láru voru upp völlinn.

Þegar litið er á sendingar fram á við (e. forward passes) þá er Lára sá miðjumaður í deildinni sem tekur langflestar þannig sendingar að meðaltali í leik. Hún er mikið í því að færa boltann fram á við og þannig ýta liði sínu upp völlinn. Og yfirleitt gerir hún það hratt og örugglega.

Því þrátt fyrir að gefa langflestarflestar sendingar fram á við þá er hún líka með besta sendingarhlutfallið af miðjumönnum deildarinnar í slíkum sendingum. Það gefur vísbendingar um þau gæði sem hún býr yfir.


Röðunin yfir þá miðjumenn (sem hafa spilað meira en 1000 mínútur) sem hafa átt flestar 'forward passes' í sumar. Lára er þar langefst. Hún er líka með besta sendingarhlutfallið í þessum sendingum.

„Hún er að mínu mati besti miðjumaður deildarinnar," segir Ásgerður Stefanía Baldursdóttir, liðsfélagi Láru, í samtali við Fótbolta.net en Adda, eins og hún er alltaf kölluð, og Lára hafa lengi spilað saman inn á miðsvæðinu - bæði í Stjörnunni og Val.

Listin að brjóta línurnar
Í fótbolta er lykilatriði að hafa einhvern tilgang í því sem þú gerir við boltann.

Það er mjög flott að vera með háa sendingartölfræði en það skiptir voðalega litlu máli ef það er enginn tilgangur í því sem þú ert að gera; ef þú ert til dæmis bara að senda til baka og kannski til hliðar.

Eitt af því sem Valur hefur gert vel í sumar - og Lára sérstaklega - er að brjóta línurnar.

Á fótboltavellinum eru ákveðnar línur - ef svo má að orði komast. Þetta eru ímyndaðar línur sem tengja saman leikmenn í því leikkerfi sem þeir eru að spila.


Hérna sjáum við dæmi um 4-4-2 kerfi þar sem lína er brotin með sendingu í svæði á milli lína. Svona sendingar gera mikið til að rugla í skipulagi andstæðingsins. Þetta er góð og hnitmiðuð leið til að færa boltann upp völlinn.

Í sumar er Valur í þriðja sæti í Bestu deildinni yfir lið sem hafa haldið boltanum mest en þær eru um 56 prósent með boltann að meðaltali í leik.

En yfirleitt er alltaf einhver tilgangur í því sem þær eru að gera. Þær reyna að flytja boltann hratt upp völlinn. Þær eru með langflestar sendingar inn á síðasta þriðjung vallarins af öllum liðum deildarinnar. Þetta er að búa til færi og mörk, en Valur hefur skorað flest mörk í sumar.

Lára er virkilega góð í þessu að finna sendingu fram á við með því að brjóta línurnar. Hún hefur verið að tengja mikið við sóknarmiðjumanninn í liði Vals sem hefur annað hvort verið Ásdís Karen Halldórsdóttir eða Ída Marín Hermannsdóttir, og líka bara við sóknarmanninn sem hefur oftast verið Cyera Hintzen.


Sendingarkort úr leiknum gegn KR á dögunum. Lára tengdi mest við Cyeru sem var fremsti maður Vals í leiknum. Þarna sést einnig hvað hún er að tengja vel við nánast alla liðsfélaga sína. Hún er að dreifa spilinu vel.

Að senda boltann í gegnum línurnar er frábær leið til þess að fá boltann upp völlinn hratt og effektívt - og um leið fara fram hjá skipulagi andstæðingsins og rugla í því.

Valur hefur í sumar oft á tíðum ekki verið að halda í boltann bara til þess að halda í boltann. Þær horfa yfirleitt fram völlinn í átt að marki andstæðingsins. Lára er mjög oft arkitektinn að uppspilinu sem Valsliðið fer í.

Sjáum hér dæmi í 5-0 sigrinum gegn Keflavík þar sem Valsliðið var með mikla yfirburði.


Boltinn berst upp, til hægri og þaðan inn á miðju. Lára fær boltann við miðjubogann. Tekur vel á móti boltanum þannig að hún getur strax horft upp.

Það er ekkert verið að horfa niður, hausinn leitar beint upp.

Frábær sending í gegnum miðju Keflavíkur - í gegnum línuna - og Ásdís Karen fær í kjölfarið fínt skotfæri. Mjög effektív og góð sókn. Ásdís setur boltann yfir markið en þarna skapaðist hætta.

Yfirsýn og gæði
Lára Kristín er með mikil gæði í sínum sendingum og býr hún yfir mikilli yfirsýn, sendingarhlutfall hennar er mjög gott - sérstaklega í ljósi þess hve mikið hún er að senda boltann upp völlinn.

„Hún er með einstakan leikskilning og sendingargetu í hæsta gæðaflokki," segir Adda.



„Lára er með fótboltagreind á háu stigi. Hún les hlaup liðsfélaga sinna vel. Hún er líka sterk í návígum, bæði á grasi og í lofti. Vigt í sendingum er hennar sérkenni."

Það eru nokkuð mörg dæmi um það í sumar þar sem Lára hefur sýnt gæði sín með stórkostlegum sendingum.


Úr leik gegn KR. Lára fær boltann inn á miðjum vellinum og er með pláss til að vinna með.

Hún horfir til hliðar en er löngu búin að horfa upp. Hún lætur sem hún sé að fara að senda til hliðar en veit fyrir löngu hvað hún er að fara að gera.

Hún splittar bæði vörn og miðju með stórkostlegri sendingu á Þórdísi Hrönn sem skorar.

Annað dæmi er mark sem Valur skoraði gegn Þór/KA fyrr í sumar. Aftur átti Lára þá stórkostlega sendingu fram á Þórdísi. Markið má í spilaranum hér að neðan (frá Vísi).



Svo er mark Vals gegn Breiðabliki fyrr í þessari viku gott dæmi um það hversu vanmetin þáttur hennar er oft í sóknarleik Vals.


Arna Sif vinnur einvígið og kemur boltanum upp á Láru. Í þessu tilfelli sýnir hún hversu miklum leikskilning hún býr yfir.

Hún er búin að horfa tvisvar, þrisvar í kringum sig áður en boltinn berst til hennar. Hún er ekkert að tvínóna við hlutina, sér að Elísa er með mikið pláss. Hún kemur boltanum á Elísu í fyrsta.

Elísa fær mikið svæði og á geggjaða sendingu inn fyrir á Cyeru sem klárar ótrúlega vel.

Lára er bara með þrjár stoðsendingar í sumar. Hún á ekki alltaf lokasendinguna en þetta er gott dæmi um að framlag hennar skiptir miklu máli fyrir Valsliðið.



Stór ástæða fyrir því að sóknarlína Vals hefur blómstrað
Lára er alls með 12,14 sendingar að meðaltali í leik inn á síðasta þriðjung sem er það mesta af miðjumönnum deildarinnar en hún er bara með 0,34 lykilsendingar í leik.

Það er ekki sérlega mikið en það er vegna þess að þegar verið er að tala um lykilsendingar að þá er verið að tala um sendingar sem búa til færi um leið. Lára er meira í því að ýta boltanum upp á liðsfélaga sem eiga svo lokasendinguna.

Hún er að spila frekar aftarlega á vellinum og fær því ekki ótrúlega mörg tækifæri til að koma sér í stöður til að búa til margar stoðsendingar.


Hitakort Láru í sumar. Hún er að vinna mikla vinnu á miðsvæðinu. Hún er bara með 0,83 snertingar inn í teig að meðaltali í leik sem er frekar lítið. Hún er ekki mikið að fara inn í teig andstæðingsins.

Lára er ekki búin að skora í deildinni í sumar og er "bara" búin að leggja upp þrjú mörk. Það er kannski hægt að skjóta á hana fyrir það, en það er bara ekki hennar hlutverk endilega. Það sem hún gerir í sínum leik skiptir svo miklu máli fyrir Valsliðið.

Þeirra sóknarleikur er mjög effektívur og er Lára Kristín er að einhverju leyti arkitektinn að því að leikmenn eins og Ásdís Karen Halldórsdóttir og Þórdís Hrönn Sigfúsdóttir nái að láta ljós sitt skína á síðasta þriðjungi vallarins. Hún er að skila boltanum til þeirra.


Hérna er dæmi um það einmitt. Lára fær boltann fyrir aftan miðju og er fljót að líta upp. Hún finnur Elínu Mettu sem er mjög góð í að halda boltanum.

Elín Metta tekur við boltanum og setur hann svo í svæðið á Cyeru sem hleypur upp vænginn og skilar honum fyrir markið.

Ída Marín endar svo á því að skora með góðu hlaupi inn í teiginn.

Þetta er gott dæmi um það af hverju Lára Kristín er svo mikilvæg í uppspili Vals.

„Lára er ofboðslega mikilvæg fyrir okkur hjá Val, hún leysir uppspil okkar einstaklega vel með því hversu klók hún er; bæði að finna sér svæði og með gæðum sínum í löppunum," segir Adda en Lára hefur verið svolítið verið mikið í því að finna sér svæði í sumar með því að draga sig til hliðar af miðsvæðinu. Hefur það gengið vel hjá henni.



Samvinnan með Öddu
Núna seinni hluta sumarsins hefur Valur stillt upp sama byrjunarliðinu í hverjum leiknum á fætur öðrum. Lára Kristín er inn á miðsvæðinu og með henni er leikmaður sem hún þekkir ansi vel, Adda Baldurs.

Þær hafa verið að leika gríðarlega vel saman, líkt og þær gerðu í Stjörnunni. Það er ljóst að samvinna þeirra er einkar góð.

„Það er að sjálfsögðu mjög gott að hafa Láru með mér inn á miðju af mörgum ástæðum. Fyrst og fremst því hún er frábær leikmaður," segir Adda.

„Við Lára höfum spilað lengi saman og höfum klikkað vel frá fyrsta degi. Við vegum hvor aðra upp, þekkjum inn á styrkleika og veikleika hvor annarra. Við viljum gera liðið betra og það er það sem lætur okkur tikka."



Eftir að Adda kom inn í liðið þá hefur Lára verið að ýta aðeins meira upp völlinn. Adda er gríðarlega sterk varnarlega - Lára er ekki slæm þar heldur - og er hún tilbúin að vera akkerið á miðjunni. Það er líklega góð tilhugsun fyrir Láru að vera með eins reynslumikinn og öflugan leikmann sér við hlið.

Adda er búin að vinna 71,4 prósent varnareinvíga sinna í sumar sem er gríðarlega mikið.


Adda er góður félagi að hafa inn á miðsvæðinu.

Samanburður við Keiru Walsh
Keira Walsh var einn besti leikmaður Evrópumótsins í sumar, ef ekki sá besti.

Hún var algjörlega frábær í stórkostlegu liði Englands.

Það er kannski stórt til orða tekið, en þegar undirritaður hugsaði til þess að bera einhvern leikmann saman við Láru þá var nafn Walsh það fyrsta sem kom upp í hugann.


Keira Walsh.

Hin 25 ára gamla Walsh spilaði aftarlega á vellinum fyrir enska liðið í sumar - inn á miðsvæðinu. Hún var mikið í boltanum og með hátt sendingarhlutfall á EM (88 prósent).

Walsh er þannig leikmaður að hún fær boltann og ber hann upp. Hún sér alltaf heildarmyndina í kringum sig og tekur skynsamlegar ákvarðanir. Hún leitar mikið fram á við og það voru fáir leikmenn í ensku úrvalsdeildinni á síðustu leiktíð sem voru eins góðir í því og hún. Líkt og Lára er hér á Íslandi.



Þær eru ekki alveg nákvæmlega eins leikmenn, en það er margt í þeirra fari sem er líkt. Það svona helst að þær eru báðar mjög góðar í að færa boltann upp og sjá völlinn afskaplega vel.

Walsh er kannski með meiri gæði heilt yfir og það er ástæða fyrir því að hún er að spila í Barcelona, en þær eru báðar virkilega góðar í fótbolta.

Walsh varð nýverið dýrasti leikmaður í sögu kvennaboltans er hún var keypt frá Manchester City til Barcelona.



Það sem skiptir hana máli er að liðið spili vel
„Já, mér finnst það tvímannalaust," segir Adda um það hvort Lára eigi skilið meira hrós.

„Lára er einn af leim leikmönnum þar sem þú finnur hversu góð hún er þegar þú ert með henni í liði. Hún er ekki fyrirferðamikil fyrir þau sem ekki spá mikið í fótbolta. Það sem skiptir hana máli er að liðið spili vel, hún er ekki að eltast við tölur á kubbum, fyrirsagnir eða hrós í fjölmiðlum."

„Hún veit hversu mikilvæg hún er fyrir okkur en til að svara spurningunni aftur - þá, já hún á skilið meira lof út á við þó ég viti það vel að hún vill það ekkert endilega."



Valur er komið langleiðina með því að vinna Íslandsmeistaratitilinn en tímabilið er langt frá því að vera búið. Það eru enn þrír leikir eftir í deildinni og þá er Valsliðið að taka þátt í forkeppni Meistaradeildarinnar þar sem er möguleiki á riðlakeppni.

Lára Kristín er bara 28 ára og á nóg eftir af sínum ferli, en eins og Adda segir þá er það liðið sem skiptir mestu máli í hennar augum. Ef liðið er best þá er hún ánægð, en hún er klárlega stór ástæða fyrir því að liðið er einmitt best - þó það hafi ekki endilega verið mikið talað um það. Hún gerir aðra leikmenn í kringum sig betri og fyrir Valsliðið er það frábært.

Sjá einnig:
„Mig langar ekki neitt að vera að gera þetta"