Tómas Orri handarbrotinn og spilaði í gifsi - „Mjög snúin staða“

Í samtali við Fótbolta.net segir Tómas að bátsbeinið í hendinni hafi brotnað í leik gegn KA á Akureyri í síðustu umferð. „Ég brotna í fyrri hálfleik og er bara að drepast út leikinn. En ég næ að klára 70 mínútur og fer svo bara beint í bæinn. Þar kemur í ljós að ég sé með brotið bátsbein og fer beint í gifs,“ segir Tómas en hann bjóst ekki við að geta spilað í leiknum í gær.

„Ég var ekki vongóður um að mega spila í gær en ég fékk grænt frá dómurunum. Við gerðum gifsið í raun mjúkt og hendin var samt smá heft - ég gat lítið beitt henni sem er smá erfitt. Ég byrjaði á bekknum en kem inn á strax í hálfleik sem ég átti ekki endilega von á.“

Hann telur stöðuna margslungna þar sem hann verði að spila með gifs þar til að hann fær sérhannaða spelku. Gifsið gerir honum þó erfitt fyrir að beita hendinni.

„Þetta er mjög snúin staða þar sem ég þarf gifs áfram þangað til ég fæ mögulega sérhannaða spelku sem ég get spilað með. Lausnin í gær var bara til bráðabirgða enda erfitt að nota hendina og beita henni þegar hún er föst í gifsi og allt teipað yfir,“ segir Tómas að lokum.