Spánn: Atlético á miklu skriði - Alvarez lagði upp sigurmarkið

Atlético Madríd vann sinn sjötta leik í röð í öllum keppnum þegar liðið marði 1-0 sigur á Espanyol í La Liga á Spáni í dag.

Madrídingar hafa verið á mikilli siglingu undanfarið og unnið nokkra mikilvæga sigra, meðal annars gegn nágrönnum sínum í Real Madrid í síðasta mánuði.

Það voru varamennirnir sem sáu um að tryggja sigurinn í dag, en þeir Julian Alvarez og Alex Baena komu báðir inn af bekknum og áttu saman þátt í sigurmarkinu undir lok leiksins.

Á 89. mínútu skar Alvarez sig inn í vítateiginn og lagði boltann út á Baena, sem tók eina snertingu áður en hann stýrði boltanum í netið og tryggði Atlético öll þrjú stigin.

Þetta var fimmti deildarsigur Atlético í röð og sá sjötti í öllum keppnum, en liðið er í öðru sæti deildarinnar með 22 stig, aðeins tveimur stigum á eftir toppliði Barcelona. Espanyol situr hins vegar í tólfta sæti með átta stig.