Pepsi Max-deildin: Stjarnan gekk frá ÍA í seinni hálfleik

Stjarnan komst aftur á sigurbraut í Pepsi Max-deildinni eftir tap á Akureyri í síðustu umferð. Það hefur lítið sem ekkert gengið hjá ÍA upp á síðkastið. Stjarnan og ÍA mættust í síðasta leik dagsins í Pepsi Max-deildinni.

Stjarnan tók forystuna á 25. mínútu. Sölvi Snær Guðbjargarson, fæddur 2001, skoraði sitt annað mark í sumar. „Eyjólfur rennir boltanum á Sölva sem er rétt fyrir innan vítateiginn og á skot sem breytir um stefnu af Halli Flosa og fer í stöng og inn!" skrifaði Elvar Geir í beinni textalýsingu.

Sölvi Snær 📈 that man is going places. Best compliment I can say is he looked like an Espanyol player for the last 10 minutes in Spain.

— Lucas Arnold (@FotboltiLucas) August 18, 2019

Gestirnir af Skaganum gáfust ekki upp og þeir jöfnuðu með sprellimarki rétt undir lok fyrri hálfleiks. Aron Kristófer Lárusson, sem Skagamenn sóttu úr Þór í sumar, skoraði þá beint úr hornspyrnu. Staðan 1-1 og þannig var hún í hálfleik.

Á fyrstu mínútu seinni hálfleiks komst Stjarnan aftur yfir. Markið skoraði Þorsteinn Már Ragnarsson eftir undirbúning frá hinum efnilega Sölva Snæ.

Þetta var ekki lengi að gerast í seinni hálfleiknum. Þegar 20 mínútur voru til leiksloka skoraði Baldur Sigurðsson og gerði út af við leikinn fyrir Stjörnuna. Hann skoraði eftir hornspyrnu Jósef Kristins.

Stjörnumenn voru líklegri til að bæta við fjórða markinu en ÍA að minnka muninn á síðustu mínútunum.

Lokatölur 3-1 fyrir Stjörnuna sem er í fjórða sæti með 27 stig. ÍA er með 22 stig í sjöunda sæti.

Önnur úrslit kvöldsins:
Fyrsta stig ÍBV síðan 2. júní
Stefan Alexander bjargaði stigi gegn HK
Pepsi Max-deildin: Brandur með bæði í endurkomusigri