Grótta mætti Keflavík í seinni leik kvöldsins í Lengjudeild kvenna. Leikurinn var heimaleikur Gróttu en leikið var á Kópavogsvelli þar sem bilun varð á flóðljósunum á Vivaldi vellinum, heimavelli Gróttu.

Leikurinn var fjörugur og Grótta skoraði opnunarmarkið þegar Lovísa Davíðsdóttir kom boltanum í netið á 17. mínútu. Natasha Anasi jafnaði á 34. mínútu og þannig var staðan í hálfleik.

Kara Petra Aradóttir kom Keflavík yfir á 54. mínútu en á 58. mínútu jafnaði Tinna Jónsdóttir fyrir Gróttu. Tíu mínútum síðar skoraði Natasha sitt annað mark og tryggði Keflavík stigin þrjú.

Keflavík er með 33 stig í 2. sæti deildarinnar, stigi á eftir Tindastóli og sjö stigum fyrir ofan Hauka í 3. sætinu. Haukar og Tindastoll eiga leik til góða. Grótta er svo í 4. sæti deildarinnar.