Funheitur Brynjólfur skoraði gegn Ajax

Brynjólfur hefur verið iðinn við kolann í upphafi tímabilsins og var kominn með fimm mörk fyrir leikinn í dag.

Hann skoraði gegn Excelsior í síðustu umferð og var aftur á skotskónum í dag þegar hann minnkaði muninn í 2-1 gegn Ajax.

Þetta var sjötta deildarmark hans á tímabilinu og er hann nú markahæstur í deildinni ásamt fjórum öðrum leikmönnum.

Markið dugði Groningen þó ekki til stiga og situr liðið í sjöunda sæti með 14 stig, en Ajax er í fjórða sæti með 18 stig.

Daníel Tristan Guðjohnsen var í byrjunarliði Malmö sem tapaði 1-0 fyrir Häcken í sænsku úrvalsdeildinni. Hann fór af velli á 54. mínútu en Malmö situr í sjöunda sæti með 36 stig.

Eggert Aron Guðmundsson og Sævar Atli Magnússon voru báðir í byrjunarliði Brann sem tapaði 3-1 fyrir Vålerenga í norsku úrvalsdeildinni. Kolbeinn Birgir Finnsson var ekki með Vålerenga vegna meiðsla.

Brann er í sjöunda sæti með 29 stig en Vålerenga situr í ellefta sæti með 26 stig.

Breki Baldursson var í byrjunarliði Åsane sem tapaði 1-0 fyrir Stabæk í norsku B-deildinni. Åsane er í næstneðsta sæti með 22 stig.

Davíð Snær Jóhannsson var einnig í byrjunarliði Bryne sem beið 4-2 ósigur gegn Ranheim. Bryne situr í sjötta sæti með 39 stig.