Búist er við að hollenski vængbakvörðurinn fjölhæfi Ian Maatsen muni yfirgefa Chelsea í sumar, en hann hefur verið að gera góða hluti á láni hjá Borussia Dortmund á seinni hluta tímabils.
Maatsen er 22 ára Hollendingur sem getur spilað í öllum stöðum á vinstri væng vallarins. Hann á 16 leiki að baki fyrir Chelsea en gerði frábæra hluti á láni hjá Coventry og Burnley í Championship deildinni á síðustu tveimur tímabilum.
Honum tókst ekki að vinna sér inn byrjunarliðssæti hjá Chelsea undir stjórn Mauricio Pochettino síðasta haust og var í kjölfarið lánaður til Dortmund í janúar. Þar hefur hann unnið sér inn byrjunarliðssæti og var mikilvægur í dýrmætum sigri Dortmund gegn Atlético Madrid í 8-liða úrslitum Meistaradeildarinnar í vikunni.
Maatsen á rúmlega tvö ár eftir af samningi sínum við Chelsea, sem vill fá 35 milljónir punda fyrir leikmanninn.
Maatsen hefur ekki fengið tækifæri með A-landsliði Hollands en er lykilmaður í U21 liðinu.
Athugasemdir