Lengjudeildin: Þróttur í Bestu deildina

Þróttur R. er búið að tryggja sér sæti í Bestu deildinni á næsta ári eftir nauman sigur gegn Fylki í úrslitaleik umspils Lengjudeildarinnar.

Liðin mættust á Laugardalsvelli og var staðan markalaus eftir tíðindalítinn fyrri hálfleik.

Þróttur fékk besta færið í bragðdaufum fyrri hálfleik en Fylkismenn vildu vítaspyrnu sem þeir fengu ekki.

Í síðari hálfleik átti Aron Snær Ingason skot í stöng fyrir Þrótt og komst Örn Bragi Hinriksson í dauðafæri en Ólafur Kristófer Helgason varði meistaralega.

Þróttarar voru sterkari aðilinn og skoraði Aron Snær það sem reyndist eina mark leiksins á 78. mínútu eftir frábæran undirbúning. Tryggvi Snær Geirsson var kominn í frábæra stöðu í vítateig Fylkis eftir laglegt þríhryningsspil og var óeigingjarn þegar hann sendi boltann þvert fyrir markið í stað þess að skjóta sjálfur. Aron skoraði af stuttu færi og áttu Árbæingar engin svör.

Fylkismenn sköpuðu sér lítið sem ekkert á lokakaflanum og sigldu Þróttarar afar dýrmætum sigri í höfn. Lokatölur 1-0.

TENGT EFNI19.09.26 - 18:08

Einkunnir úr úrslitaleiknum: Aron skaut Þrótti í Bestu deildina