Besta deildin: Skagamenn skoruðu tvö mörk í uppbótatíma

Fram fékk ÍA í heimsókn í Bestu deildinni í kvöld. Það var ljóst fyrir leikinn að Fram endar í 3. sæti deildarinnar en ÍA er í baráttu um 4. sæti.

Fram náði forystunni strax í upphafi leiks þegar Kristófer Konráðsson skoraði með hnitmiðuðu skoti í nærhornið. Stuttu síðar voru Framarar orðnir manni færri þegar Freyr Sigurðsson var rekinn af velli fyrir brot á Rúnari Má Sigurjónssyni.

Baldvin Þór Berndsen jafnaði metin fyrir Skagamenn þegar hann skoraði með glæsilegu skoti. Baldvin var aftur á ferðinni eftir klukkutíma leik þegar hann skallaði boltann í netið eftir hornspyrnu og kom Skagamönnum yfir.

Framarar svöruðu nokkrum mínútum síðar þegar Kristófer skoraði með skalla eftir fyrirgjöf frá Þorra Stefáni Þorbjörnssyni.

Það var svakaleg dramatík í lokin. Johannes Vall átti fyrirgjöf og boltinn barst til Rafael Mána Þrastarson og hann skoraði sitt fyrsta mark í efstu deild. Þeir voru ekki hættir því Viktor Jónsson innsiglaði sigurinn strax í kjölfarið.

ÍA er í 4. sæti með 37 stig, stigi á undan Breiðabliki en Fram er í 3. sæti með 46 stig.