„Ég er ánægður með leikplanið sem slíkt og þá vinnu sem við lögðum í vikuna eftir erfiðan Skagaleik. Við lokuðum vel á það sem Víkingur hefur fram að færa og ég er ánægður með það sem að strákarnir lögðu í leikinn,'' sagði Óli Stefán Flóventsson, þjálfari KA eftir tíðindalítinn 0-0 jafnteflisleik á Greifavellinum í Pepsi Max deild karla.
Lestu um leikinn: KA 0 - 0 Víkingur R.
„Við vorum of hræddir við að halda boltanum og færa boltann á milli og opna þá almennilega. Mér fannst alveg ástæðulaust að vera hræddur við það,'' bætti Óli Stefán við.
„Við ætluðum að vera þéttir og loka á frá síðasta leik sem var tiltölulega opinn. Víkingarnir hafa sinn stíl og sitt plan og ég ber fulla virðingu fyrir því að það er ekkert eina leiðin til þess að spila fótbolta, þú verður að finna eitthvað sem er hentugt fyrir þitt lið og þinn hóp.''
Rodri hefur verið frá vegna slæmrar sýkingar í fæti. Óli Stefán greindi frá stöðunni á honum.
„Hann er bara nýkominn af sjúkrahúsi. Hann fékk svona hrottalega slæma sýkingu í fótinn og búinn að vera með sýklalyf í æð í 8 eða 9 dag og núna tekur bara tíma fyrir hann að koma til baka. Vonandi gerir hann það sem fyrst bara, að hann nái heilsu aftur. Það er númer eitt, tvö og þrjú.''
Viðtalið má sjá í heild sinni í spilaranum hér að ofan.
Athugasemdir