ÍBV án varamarkmanns í síðustu leikjum - „Fékk leyfi til að fara heim"

„Við erum með 2. flokks peyja, Max (Maksymilian Antoni Bulga), á æfingum. Marcel fékk leyfi til að taka smá frí og það er í rauninni bara staðan. Það er bara ákvörðun þjálfarans að vera ekki með varamarkmann á skýrslu, við skiptum okkur ekki að því," segir Magnús Sigurðsson sem er meðstjórnandi í fótboltaráði ÍBV.

Verður Marcel í hóp í næsta leik eða gæti hann verið á förum?

„Það er bara óljóst, engin ákvörðun sem hefur verið tekin. Hann er okkar markmaður, er með samning og þannig er staðan. Hann var í Póllandi, fékk leyfi til að fara heim, og sneri til baka skömmu fyrir leikinn í gær. Það er svo undir þjálfaranum komið hvort hann verði í hóp í næsta leik."

Ánægðir með hópinn og viðræður við Sowe
Eru Eyjamenn að skoða eitthvað á markaðnum?

„Við erum eins og alltaf með augun opin ef eitthvað álitlegt býðst, en við erum ekki á fullu að leita að einhverjum leikmönnum. Við erum mjög sáttir með hópinn."

Omar Sowe hefur verið orðaður við KR, er pottþétt að hann klárar allavega tímabilið í Eyjum?

„Já, það er 100%. Við eigum í samtali við hann um mögulega framlengingu á samningi hans," segir Magnús.

Næsti leikur ÍBV er útileikur gegn Breiðabliki eftir viku.